To Chat with me click here
Showing posts with label Rushwa. Show all posts
Showing posts with label Rushwa. Show all posts

Thursday, February 7, 2013

RUSHWA MAHAKAMANI YAMTISHA JK


Rais Jakaya Mrisho Kikwete

RAIS Jakaya Kikwete amesema mwenendo wa sasa wa utendaji kazi wa mahakama za hapa nchini unatiliwa shaka na wananchi, kutokana na kukithiri kwa vitendo vya rushwa vinavyofanywa na baadhi ya watumishi wa idara hiyo.
Amesema malalamiko mengi ya wananchi yenye mwelekeo unaoonyesha haki haiwezi kupatikana mahakamani isipokuwa kwa kununuliwa na wenye fedha, ni ishara kuwa jamii imekosa imani na mhimili huo wa dola.

Rais Kikwete alisema hayo jana, wakati wa maadhimisho ya Siku ya Sheria nchini, yaliyofanyika katika viwanja vya Mahakama Kuu, jijini Dar es Salaam.

Maadhimisho hayo, ambayo pia yalihudhuriwa na Jaji Mkuu, Othman Chande, pamoja na wanataaluma wengine wa sheria, kauli mbiu yake ya mwaka huu ni utawala wa sheria, umuhimu na uimarishaji wake hapa nchini.

Rais Kikwete aliwataka watumishi wa idara hiyo kushirikiana kuondoa dhana iliyojengeka kwa wananchi kuwa haki inapatikana kwa kununuliwa na kusisitiza kuwa dhana hiyo ni doa kubwa kwa mahakama.

“Ni doa kubwa kusikia haki inatolewa kwa wenye fedha mahakamani, ikiwezekana shirikisheni jamii ili kuondoa doa hilo, lakini bila kukiuka miiko ya majaji na mahakimu.

“Watu wanapenda haki itendeke, mashauri yamalizike kwa wakati na wanachukizwa na mashauri kupigwa kalenda mara kwa mara. Na lawama zinazotolewa si kwa upande wa mahakama peke yake, bali hata ucheleweshaji wa kesi husababishwa na upelelezi kuchelewa kukamilika, mawakili na wadau wengine. Hapo muone kuwa ipo haja ya kukaa chini kuangalia jinsi ya kupunguza malalamiko hayo,” alisema Rais Kikwete.

Akizungumzia bajeti finyu inayotolewa na serikali kwa mahakama, alisema tatizo hilo lipo kila katika idara na wizara zote za serikali na linasababishwa na mapato madogo ya serikali.

Alisema maombi ya fedha kwa ujumla yanayowasilishwa serikalini ni trilioni 19 na bilioni 3, mapato ya Serikali kwa ujumla wake ni trilioni 15, jambo linaloonyesha wazi kuwa serikali haiwezi kutosheleza mahitaji yote.

Aliahidi kuongeza fungu la bajeti la mahakama katika bajeti ya mwaka ujao wa fedha na kwamba kiasi kitakachoombwa na idara hiyo kitapelekwa kwa wakati.

Naye Rais wa Chama cha Wanasheria Tanganyika, Francis Stolla, akizungumza katika maadhimisho hayo, alisema Bunge Tanzania linakabiliwa na changamoto ya umakini linapoketi kutunga sheria.

Alisema Bunge linapaswa kuichukua changamoto hiyo kwa sababu kuna tatizo la sheria kukinzana, jambo ambalo linasababisha usumbufu kwa baadhi ya wananchi na wakati mwingine haki kutotendeka.

Kwa upande wake, Jaji Mkuu Chande, alikemea tabia ya wananchi kuchukua sheria mkononi kwa kuchoma moto wenzao na kuharibu mali za wanaotuhumiwa kwa makosa ambayo mengine huthibitika baadaye kuwa hawakufanya.

Thursday, November 1, 2012

MBUNGE CCM ANASWA KWA RUSHWA

TAKUKURU YADAI ALIKUWA AKIGAWA FEDHA

Mhe. Mussa Azzan Zungu
WINGU la rushwa limeendelea kutanda katika Chama Cha Mapinduzi (CCM), na sasa Mbunge wake wa Ilala, Mussa Zungu, anashilikiwa na Taasisi ya Kuzuia na Kupambana na Rushwa (TAKUKURU), akituhumiwa kutoa rushwa kwa baadhi ya wajumbe wa Jumuiya ya Wazazi.

Zungu ambaye anakuwa mbunge wa pili wa CCM kunaswa na TAKUKURU kwa tuhuma za rushwa, anashikiliwa pamoja na wajumbe wawili wa jumuiya hiyo.

Mbunge huyo ambaye pia ni Mwenyekiti wa Bunge, alikuwa akigombea nafasi ya Mjumbe wa Halmashauri Kuu ya Taifa ya chama hicho (NEC) kupitia Jumuiya ya Wazazi Tanzania Bara na alinaswa juzi sambamba na Dk. Damas Mukasa na Fatuma Kasenga.

Akizungumza na waandishi wa habari mjini hapa jana, Mkuu wa TAKUKURU Mkoa wa Dodoma, Yunis Munisi, alisema Zungu alikamatwa Oktoba 30, mwaka huu, siku moja kabla ya uchaguzi huo.

Akielezea mazingira ya kukamatwa kwao, alisema Zungu alikamatwa akiwa na wapambe wake wanne akitoa rushwa kwa wajumbe ili wampigie kura.

Kuhusu Dk. Mukasa ambaye alikuwa akigombea nafasi ya ujumbe wa Baraza Kuu la Wazazi Taifa na mjumbe wa Mkutano Mkuu CCM Taifa, Munisi alisema alikamatwa Oktoba 8, mwaka huu, nje ya Ukumbi wa Kilimani mjini hapa kwa kosa la kutoa rushwa kwa wajumbe ili wampigie kura.

Pamoja na hilo, wajumbe wengine wawili nao wanashikiliwa na TAKUKURU kwa kosa la kupokea rushwa kutoka kwa Dk. Mukasa ili wamchague.

Mgombea mwingine aliyekamatwa, Fatuma, ambaye ni Mwenyekiti wa Jumuiya ya Wazazi Mkoa wa Mbeya na Mkutano Mkuu Wazazi Taifa, alikamatwa saa tisa usiku wa kuamkia jana akiwa analipia baadhi ya wajumbe wa mkutano vyakula na vinywaji.

“Inaaminika kwamba huo ulikuwa ni ushawishi ili wajumbe wamchague...alikamatwa katika nyumba ya wageni ya Kitoli iliyopo eneo la Iringa Road mjini Dodoma,” alisema Munisi.

Alisema TAKUKURU imekuwa ikifuatilia taarifa za vitendo vya rushwa tangu kuanza kwa chaguzi za ndani za CCM kuanzia ngazi za chini hadi taifa kwa lengo la kuzuia na kupambana na vitendo hivyo.

Munisi alisema hatua hiyo imefanikiwa kuzuia vitendo vingi ambavyo vilitaka kutendeka baada ya kupata mipango hiyo na kuitibua kabla ya kufanikiwa.

Hata hivyo, alisema changamoto kubwa waliyokumbana nayo ni kitendo cha wajumbe kushirikiana na wagombea na wapambe wao katika vitendo vya rushwa, na hivyo kuwa shida kufanya ushirikiano.

Alisema changamoto nyingine inatokana na wananchi kudai wameona vitendo vya rushwa vikitendeka, lakini hawachukui hatua zozote za kutoa taarifa TAKUKURU.

Kuhusu tuhuma zinazowakabili akina Zungu na wenzake, alisema uchunguzi unaendelea.

Thursday, October 18, 2012

RUSHWA YAVUNJA UCHAGUZI CCM PWANI


TUHUMA za kushamiri kwa vitendo vya rushwa katika Mkutano Mkuu wa Uchaguzi wa CCM mkoani Pwani, jana vilimlazimisha mwenyekiti wa chama hicho mkoani humo, Mwinshehe Mlao kuvunja mkutano huo.

Uchaguzi huo uliokuwa ufanyike kwenye Jengo la Mkuu wa Mkoa wa Pwani, uliahirishwa saa chache, kabla ya upigaji kura kuanza kutokana na kuwapo kwa taarifa kwamba baadhi ya wajumbe walikuwa wakitoa na kupokea rushwa ili kushawishi ushindi wa baadhi ya wagombea.

Mwenyekiti wa Kamati ya Ulinzi na Usalama ambaye pia ni Mkuu wa Mkoa wa Pwani, Mwantumu Mahiza aliwaeleza wajumbe hao kuwa amepata taarifa kutoka vyombo vya usalama kuwa uchaguzi huo umegubikwa na vitendo vinavyoashiria kuwapo na rushwa.

Akiahirisha mkutano huo jana, Mlao alisema amelazimika kusitisha uchaguzi huo hadi utakapotangazwa tena, kutokana na baadhi ya wajumbe kukidhalilisha chama kwa kujihusisha na rushwa.

“Kwa haya yaliyotokea lazima tuwasiliane na wenzetu makao makuu. Baada ya kusema haya natangaza kuahirisha kikao hadi tarehe ya uchaguzi itakapotangazwa tena,” alisema Mlao.

Friday, September 28, 2012

VULLU (CCM) AKALIA KUTI KAVU

NI ANAYEDAIWA KUKAMATWA KWA RUSHWA KISARAWE, NAPE ASEMA ATACHUNGUZWA NA KAMATI YA MAADILI

Hon. Zaynab Vullu (CCM) Special Sit
MBUNGE wa Viti Maalum, Zainab Vullu (CCM), Mwenyekiti wa Jumuiya ya Wanawake Tanzania (UWT), Wilaya ya Kisarawe, Asia Madima na Katibu wa UWT wa wilaya hiyo, Mwajuma Mombwe, wako hatarini kung’olewa katika nafasi wanazogombea.

Katibu wa Itikadi na Uenezi wa CCM, Nape Nnauye, jana alisema kwamba baada ya vyombo vya habari kuripoti jana, kwamba Vullu na wenzake hao walikamatwa na Taasisi ya Kuzuia na Kupambana na Rushwa (TAKUKURU), Wilaya ya Kisarawe, Kamati ya Maadili ya CCM itakwenda Kisarawe kuchunguza tuhuma hizo.

Kwa mujibu wa Nape, kama kamati hiyo ikithibitisha kwamba Vullu, Asia na Mwajuma walikamatwa wakigawa rushwa, wataondolewa mara moja kwenye mchakato wa kugombea nafasi mbalimbali za chama hicho.

Vullu ndiye Mwenyekiti wa UWT Mkoa wa Pwani na anatetea nafasi yake.
“Mgombea yeyote atakayebainika kukiuka maadili kwa kutoa rushwa katika chaguzi mbalimbali zinazoendelea ndani ya chama, ataondolewa kwenye mchakato wa uchaguzi.

“Nasema hivyo kwa sababu majina ya wanachama yaliyopitishwa katika vikao vya chama hayamaanishi kwamba wagombea wamehakikishiwa ushindi wa kufanya watakavyo.

“Chama hakitasita kumwondoa mwanachama yeyote atakayebainika kujihusisha na vitendo vya rushwa wakati huu wa mchakato ndani ya chama.

“Sasa nasema hivi, Kamati ya Maadili itakwenda huko Kisarawe kuchunguza tuhuma hizo na kama ikibainika wanachama hao wamejihusisha na vitendo vya rushwa, wataondolewa mara moja kwenye mchakato wa uchaguzi.

“Ni juzi tu Halmashauri Kuu imeonya wote wanaodhani kwamba kupitishwa kwa majina yao katika vikao vya Halmashauri Kuu ni tiketi ya kufanya watakavyo, wanajidanganya.

“Kupitishwa majina yao ni jambo moja na kushiriki mchakato wa uchaguzi ni suala jingine, hivyo wakibainika kukiuka maadili, nasema wataondolewa mara moja kwenye mchakato,” alisema Nape kwa kifupi.

Juzi TAKUKURU, Wilaya ya Kisarawe, Mkoa wa Pwani, iliwatia mbaroni Mbunge wa Viti Maalum, Zainab Vullu (CCM), Mwenyekiti wa Jumuiya ya Umoja wa Wanawake (UWT), Wilaya ya Kisarawe ambaye pia ni Makamu Mwenyekiti wa Halmashauri ya Wilaya ya Kisarawe, Asia Madima, pamoja na Katibu wa UWT wa wilaya hiyo, Mwajuma Mombwe, kwa tuhuma za rushwa.

Chanzo chetu cha habari kilichopo wilayani Kisarawe kilisema kuwa, Vullu na wenzake hao, walikamatwa Jumanne wiki hii, saa 12 jioni, baada ya kudaiwa kugawa fedha kwa wajumbe waliohudhuria kikao cha Baraza la UWT, Wilaya ya Kisarawe, kilichokuwa kikifanyika makao makuu ya CCM, Wilaya ya Kisarawe.

Kwa mujibu wa chanzo hicho, Vullu, Asia na Mwajuma, walikamatwa na Kamanda wa TAKUKURU, Wilaya ya Kisarawe, aliyetajwa kwa jina moja la Noel.

Thursday, September 27, 2012

MBUNGE CCM AKAMATWA KWA TUHUMA ZA RUSHWA

Mbunge wa Viti Maalum (CCM) Zaynab Mattitu Vullu
TAASISI ya Kuzuia na Kupambana na Rushwa (TAKUKURU), Wilaya ya Kisarawe, Mkoa wa Pwani, imemtia mbaroni Mbunge wa Viti Maalum, Zainab Vullu (CCM) kwa tuhuma za rushwa.

Vullu alikamatwa juzi pamoja na wenzake wawili ambao ni Mwenyekiti wa Jumuiya ya Umoja wa Wanawake (UWT), Wilaya ya Kisarawe ambaye pia ni Makamu Mwenyekiti wa Halmashauri ya Wilaya ya Kisarawe, Asia Madima pamoja na Katibu wa UWT wa wilaya hiyo, Mwajuma Mombwe.

Chanzo chetu cha habari kilichopo wilayani Kisarawe kilisema jana, kuwa Vullu na wenzake hao, walikamatwa juzi saa 12 jioni baada ya kudaiwa kugawa fedha kwa wajumbe waliohudhuria kikao cha Baraza la UWT, Wilaya ya Kisarawe kilichokuwa kikifanyika makao makuu ya CCM, Wilaya ya Kisarawe.

Kwa mujibu wa chanzo hicho, Vullu, Asia na Mwajuma, walikamatwa na Kamanda wa TAKUKURU, Wilaya ya Kisarawe, aliyetajwa kwa jina moja la Noel.

“Kabla hawajakamatwa, tuliingia katika kikao cha Baraza la UWT la Wilaya ambako tulichagua wajumbe wa Kamati ya Utekelezaji.

“Tulipomaliza kuchaguana, akaja Mama Vullu (Zainab Vullu), akapewa nafasi ya kuzungumza, akatwambia kwamba, Oktoba 3 mwaka huu, baadhi yetu tukalale nyumbani kwake na wengine tukalale katika ofisi za chama chetu hapa Kisarawe kwa ajili ya kufika mapema kwenye uchaguzi wa jumuiya yetu utakaofanyika Oktoba 4 katika Ukumbi wa Filbert Bayi.

Friday, August 17, 2012

VIGOGO WALIOFICHA FEDHA NJE WABANWA


TAKUKURU YASEMA IMEANZA KUWACHUNGUZA


SIKU moja baada ya Naibu Kiongozi wa Kambi ya Upinzani Bungeni, Kabwe Zitto, kutishia kuwataja vigogo wa serikali walioficha mabilioni ya fedha kwenye akaunti za nje ya nchi, ikiwa serikali haitawataja, Taasisi ya Kuzuia na Kupambana na Rushwa (TAKUKURU), imeibuka na kudai kuwa inazifanyia kazi tuhuma hizo.

Zitto alisema kuwa wamepata taarifa kuwa mmoja  wa viongozi wa juu nchini na baadhi ya mawaziri wa serikali za awamu zilizopita ni miongoni mwa  wamiliki wa fedha hizo zipatazo sh bilioni 314.5.

Alisema sehemu kubwa ya fedha hizo zililipwa na kampuni za utafutaji wa mafuta  na gesi katika pwani ya Mkoa wa Mtwara, zilizopewa mikataba kati ya mwaka 2004 na 2006, hivyo akaitaka serikali iwataje wahusika na kuwachukulia hatua, vinginevyo atawataja kwa majina.

Monday, July 30, 2012

CCM, CHADEMA WAWATANGAZIA KIAMA WABUNGE MAFISADI

 VYAMA vya CCM na Chadema vimetoa onyo kali kwa wabunge wanaotuhumiwa kwa kashfa ya kuhongwa na baadhi ya kampuni za mafuta na kulihujumu Shirika la Umeme Tanzania (Tanesco), vikisema havitasita kuwawajibisha pindi tuhuma hizo zitakapothibitika.

Kauli ya vyama hivyo imekuja siku moja baada ya wabunge watano, watatu wa CCM na wawili wa upinzani kudaiwa kuhusika na vitendo hivyo vya rushwa, ambavyo vimesababisha Spika wa Bunge, Anne Makinda kuivunja Kamati ya Bunge ya Nishati na Madini na kuagiza uchunguzi wa kina ufanyike ili majina ya wahusika yawekwe hadharani.
Wakizungumza kwa nyakati tofauti jana, viongozi wa juu wa vyama hivyo walisema wanasubiri kwa hamu taarifa rasmi kutoka bungeni.

CCM: Rushwa adui wa haki
Makamu Mwenyekiti wa CCM Bara, Pius Msekwa alisema chama hicho kimewaapiza wanachama wake wote kutotoa wala kupokea rushwa.
Alisema rushwa ni kosa la jinai hivyo anaamini vyombo husika vya dola vitachukua hatua zinazofaa kwa mujibu wa sheria za nchi.

RUSHWA BUNGENI MOTO - MBATIA SASA ATISHIA KUWATAJA WAKATI WOWOTE


SAKATA la wabunge kuhongwa kwa nia ya kuyatetea makampuni ya mafuta na menejimenti ya Shirika la Ugavi wa Umeme Nchini (TANESCO) linazidi kuchukua sura mpya kadiri siku zinavyosonga mbele.

Siku moja baada ya Waziri wa Nishati na Madini, Profesa Sospeter Muhongo, kuvurumisha makombora dhidi ya wabunge hao pasipo kuwataja kwa majina, Mbunge wa Kuteuliwa, James Mbatia, ameibuka na jipya kuhusu sekeseke hilo.
Mbatia ambaye pia ni Mwenyekiti wa Taifa wa Chama cha NCCR-Mageuzi amesema wakati wowote kuanzia sasa atawataja kwa majina wabunge wote waliopokea rushwa kwa lengo la kuwalinda viongozi wakuu wa TANESCO wanaokabiliwa na tuhuma za kulihujumu shirika hilo.

Mbali ya hilo, Mbatia amemshutumu Spika wa Bunge, Anne Makinda, kwa kuwalinda wabunge hao aliodai wamehongwa na mafisadi hao wa TANESCO.
Kauli hiyo aliitoa jana mkoani hapa alipokuwa akizungumza na waandishi wa habari kuhusu uamuzi wa Spika Makinda kuridhia kuivunja Kamati ya Kudumu ya Bunge ya Nishati na Madini na kuiagiza Kamati ya Maadili, Haki na Madaraka ya Bunge kuwachunguza watuhumiwa.
Mbatia alisema Spika anao ushahidi wa kutosha wa majina ya wabunge waliohongwa kwani Waziri wa Nishati na Madini, Profesa Sospeter Muhongo, aliliambia Bunge kuwa wana ushahidi wote.
Alibainisha kuwa ushahidi huo ndiyo uliomfanya Spika Makinda akaridhia kuivunja kamati husika na kuipa kazi Kamati ya Maadili, Haki na Madaraka ya Bunge kuwachunguza watuhumiwa.

Kiongozi huyo pia alisema hawana imani na kamati iliyopewa jukumu la kuwachunguza wabunge watuhumiwa wa rushwa kwa sababu inaundwa na baadhi ya watuhumiwa.
“Tunamtaka Spika ajitakase kwanza kwa kuwaengua wajumbe ambao ni watuhumiwa, kinyume na hapo hatuna imani na kamati hiyo,” alisema.

Alisema Bunge ni chombo kitukufu na ili utukufu huo uonekane ni lazima maamuzi yanayofanywa huko yaheshimiwe, hivyo akapendekeza kuwa mbali na Bunge kutumia kanuni zake kuwahukumu wabunge watuhumiwa au linaweza kuiga maamuzi ya baadhi ya mabunge ya Jumuiya ya Madola.

Alitolea mfano mabunge ya Uingereza na India, ambapo Bunge la Uingereza limewahi kuwatimua na kuwavua ubunge wabunge 57 na India imefanya hivyo kwa wabunge 11 kutokana na kujihusisha na vitendo vya rushwa.
“Hivyo basi tunatoa wito kuwa mbunge yeyote wa chama chochote anayeamini kwa dhamira yake kwamba ni mjumbe wa Kamati ya Nishati na Madini na anafanya biashara na TANESCO kwa njia ya maslahi binafsi halafu anatumia rushwa kuwashawishi wabunge wengine au amepokea rushwa kutetea uovu ni bora akajiondoa mwenyewe kwenye ubunge kabla ya kuabishwa na Bunge,” alisema.

Mbatia aliongeza kuwa wanamtaka Spika awe amewataja kwa majina wabunge waliopokea rushwa si zaidi ya wiki moja ili Bunge liwachukulie hatua, huku akiwaomba wabunge wenzake bila kujali itikadi za vyama vyao wafanye azimio la Bunge ili wahusika mbali na kuvuliwa ubunge wafungwe jela miaka mitano.
“Kwa mujibu wa sheria namba 3 kifungu cha 32 ya Haki, Kinga na Madaraka ya Bunge ya mwaka 1988, mbunge anakatazwa kuzungumza, kuhoji, kupiga kura au kutetea jambo lolote bungeni ambalo litakuwa na ushawishi wa maslahi yake binafsi kutoka nje na kwamba adhabu yake ni kifungo kisichopungua miaka mitano jela,” alisema Mbatia.

Mwenyekiti huyo ambaye alifuatana na mbunge mwingine wa chama hicho wa Kasulu Mjini, Moses Machali, alimtaka Spika kuzitaja kamati nyingine ambazo wajumbe wake wanatuhumiwa kwa rushwa.
Mbali na Kamati ya Nishati na Madini iliyovunjwa, kamati nyingine zinazodaiwa baadhi ya wabunge wake kujihusisha na vitendo vya rushwa ni ile ya Hesabu za Mashirika ya Umma (POAC) chini ya Zitto Kabwe na Hesabu za Serikali za Mitaa (LAAC) inayoongozwa na Augustine Mrema.

Nyingine ni ya Miundombinu chini ya Peter Serukamba, Viwanda na Biashara ya Mahmoud Mgimwa na Ardhi, Maliasili na Mazingira chini ya James Lembeli.
“Tatizo la nchi yetu ni kuchelewa kufanya maamuzi wakati muafaka. Tukilitakasa Bunge kwa kuwashughulikia wabunge waliokula rushwa ni wazi hata serikali itaanza kuwachukulia hatua wale ambao tumekuwa tukiwalalamikia kujihusisha na rushwa,”
Mbatia aliwatahadharisha wabunge wa chama chake kuwa kama kuna yeyote aliyechukua rushwa katika sakata hilo, ajiengue mapema.

Mbatia pia alitumia mwanya huo kuwatia matumaini wabunge waadilifu wenye misimamo mikali ya kuikosoa serikali kuwa wasiogopeshwe na sakata hilo ambalo alidai serikali italitumia kuwanyamazisha wabunge kwa vile walikuwa wakiikosoa.
Ingawa Mbatia hakuwataja kwa majina wabunge hao, habari ambazo Tanzania Daima inazo zinaeleza kuwa wabunge zaidi ya sita wanatajwa kuwa katika kundi la wale wanaotuhumiwa kuwatetea mafisadi wa TANESCO.

Inadaiwa wabunge hao walipewa fedha na kampuni za mafuta ili washinikize kung’olewa kwa Waziri wa Nishati na Madini pamoja na Katibu Mkuu wa Wizara hiyo Eliakim Maswi wanaodaiwa kuipa zabuni ya kusambaza mafuta kwa TANESCO kampuni ya Puma Energy.
Habari zinaeleza kuwa, wabunge hao wako katika Kamati ya Hesabu za Mashirika ya Umma (POAC), Hesabu za Serikali za Mitaa (LAAC) Kamati ya Miundombinu, Kamati ya Viwanda na Biashara na Ardhi, Maliasili na Mazingira.

Vyanzo vya habari hili vimedokezwa kwamba wabunge takriban wote isipokuwa mmoja tu, walioko katika orodha hiyo wanatokana na Chama Cha Mapinduzi (CCM).