PROPAGANDA YA KATIBA MPYA: UFISADI WA CCM

HAPO mwanzo, wakati Tanganyika inapata uhuru kulikuwapo na chama cha ukombozi wa Waafrika wa Tanganyika (TANU) ambacho kiliweza kuwaunganisha wananchi! Baadaye, TANU iliungana na ASP kuunda Chama Cha Mapinduzi (CCM) ambacho kwa falsafa yake kiliamua kuandaa Katiba ya Jamhuri ya Muungano wa Tanzania ya mwaka 1977.

Katiba ya 1977 iliipa CCM haki ya kipekee ya kushika hatamu za uongozi (kama ilivyokuwa kwenye Ibara ya 10 ya Katiba ya JMT, 1977).

Katiba ya 1965 na ya 1977, TANU kwa upande wa Tanganyika ilijipendelea na haikuruhusu maoni ya wananchi isipokuwa ilichukua mamlaka wa watu na kuyafanya kuwa sehemu ya itikadi ya chama kwa madai ya kuwashirikisha wakulima na wafanyakazi.

Kwa upande wa Zanzibar, baada ya mapinduzi ya Januari 11 na 12, 1964 vyama vyote vya siasa vilipigwa marufuku na ASP iliendesha nchi kwa kutumia mawazo na maoni ya watu 14 (maarufu kama, Baraza la Watu 14 au Baraza la Mapinduzi). Fikra za watu wawili (Nyerere na Karume) zilitawala fikra za wananchi wote wa Tanzania!

Mwaka 1977, kama kawaida ya vyama vinavyopora uhuru, haki na usawa wa wananchi kwa muundo wa chama kushika hatamu, CCM ilijipa haki za kipekee (exclusive rights) za kutawala na kwa kutumia katiba iliyotungwa kukidhi utashi huo iliendelea kufaidi haki za kipekee kwa muda mrefu hata sasa!

Japokuwa CCM ilifanya ufisadi mkubwa kwenye mfumo wa serikali zake (ya muungano na ya mapinduzi), jambo kubwa lililowekwa na CCM kwenye Katiba ya 1977 ni nafasi ya kipekee ya kuongoza mabadiliko!

Mkakati wa kujipa mamlaka ya kipekee katika kufikia mujtamaa wa watu kwa uhuru, haki na usawa ulikuwa ufisadi wa kutisha ambao CCM imeendelea kuutumia hata wakati huu nchi inapotarajia kuandika Katiba Mpya!

Kazi ya kuandika katiba ya wananchi ni kazi ngumu kama kuna mikingamo inayotokana na ufisadi wa kimfumo na wa kimuundo uliyojengwa kwa miaka mingi na chama kinachoongoza kwa propaganda, hila, mizengwe, woga na ukiritimba wa kisiasa!

CCM imejenga mazingira ya kutumia uongo wa kimasilahi na kuwafanya wanachama wake waamini kila chama hicho kinachoamini na kukitetea! Tazama, wakati lilipofanyiwa upitizi Azimio la Arusha, mwenyekiti wa wakati huo, Ali Hassan Mwinyi alisema: Azimio la Arusha, kama tunavyojua, limetangazwa mwaka 1967. Hii leo tuko katika mwaka 1991.

Imepita miaka mingi, zaidi ya 20 tangu kutangazwa kwa Azimio la Arusha. Na katika kipindi cha miaka 20 yametokea mabadiliko mengi duniani na pia katika hali ya maisha yetu (rejea hotuba ya Februari,25, 1992, Diamond Jubilee, Dar es Salaam).

Hotuba ya mzee Ali Hassan Mwinyi, ililenga katika kuonesha mabadiliko yaliyotokea na yanayohitaji mabadiliko katika kufanya upitizi wa marekebisho ya Azimio la Arusha ili kwenda na wakati!

Inashangaza, CCM iliona busara kubadilisha falsafa ya kuendesha Siasa ya Ujamaa na Kujitegemea kwa kubadilisha baadhi ya miiko na maadili ya uongozi wa umma kwa kuzingatia mabadiliko ya wakati. Huku ikisisitizwa kwamba, ‘kila zama na kitabu chake.’

RAIS KIKWETE AONGOZA KIKAO CHA KAMATI KUU YA CCM LEO

MWENYEKITI wa CCM, Rais Jakaya Kikwete akiongoza kikao cha Kamati Kuu ya CCM (CC) leo katika ukumbi wa White House mjini Dodoma. Kushoto ni Makamu Mwenyekiti wa CCM (Zanzibar), Rais wa Zanzibar Dk. Ali Mohamed Shein na wengine kutoka kulia ni Makamu Mwenyekiti wa CCM (Bara) Philip Mangula na Katibu Mkuu wa CCM, Abdulrahman Kinana. Pamoja na mambo mengine, Kamati Kuu imemteua mgombea wa Ubunge katika uchaguzi mdogo jimbo la Chambani, Pemba Mattr Said. (Picha na Bashir Nkoromo).

JK, KINANA WAWATISHA WANAOTAKA URAIS 2015

KINANA AAHIDI KUWASHUGHULIKIA WANAOPANGA SAFU

MWENYEKITI wa Chama cha Mapinduzi (CCM), Rais Jakaya Kikwete, amewataka wanachama wenye nia ya kugombea urais kuacha kunyoosheana kidole na kukigawa chama, kwani chama hicho si mali ya mtu.

Pamoja na kutowataja wanachama hao, lakini makundi makubwa yanayotajwa kuwa katika vita ya kuwania urais 2015 ni lile la Waziri Mkuu aliyejiuzulu Edward Lowasa na Waziri wa Mambo ya Nje na Ushirkiano wa Kimataifa, Bernard Membe.

Akifungua Mkutano Mkuu wa CCM mjini Dodoma hivi karibuni, Rais Kikwete alikaririwa akisema hausiki wala kuyaunga mkono makundi hayo kwa namna yoyote ile.

Akizungumza jijini Dar es Salaam jana katika mkutano wa hadhara na wanachama wa chama hicho mkoa wa Dar es Salaam, Rais Kikwete alisema viongozi hao wamekuwa mstari wa mbele kuongoza makundi katika migogoro kwa lengo la kujihakikishia kuwa mwaka 2015 wanaupata urais hata kama chama kitakufa.

“Chama hiki siyo mali ya mtu, hivyo kila mtu ana haki ya kugombea nafasi yoyote anayoitaka, kama chama hiki kingekuwa mali ya mtu basi kusingekuwa na haja ya kufanyika uchaguzi kila baada ya miaka mitano,” alisema Kikwete.

Kikwete aliwataka wale wote wenye nia ya kuwania urais kuacha kujiingiza kwenye migogoro ambayo inazidi kukiweka chama kwenye nafasi mbaya katika kushinda kila chaguzi.

Migogoro na mipasuko ndani ya chama hicho imekuwa sababu ya chama hicho kupoteza baadhi ya majimbo na kata zake.

Kutokana na hali hiyo, amewataka viongozi kuhakikisha wanarudisha imani kwa wanachama na kukifanya chama hicho kuingia kwenye uchaguzi wa serikali za mitaa mwaka 2014 kikiwa kimoja, ili kujijengea mazingira ya ushindi katika Uchaguzi Mkuu wa mwaka 2015.

JK AMNG’OA MUKAMA, AMWEKA KINANA

AMTOSA CHILIGATI, AMWINGIZA NCHEMBA, ZAKIA MEGHJI, DK. ASHA-ROSE WAULA 

Mwenyekiti wa CCM, Jakaya Kikwete

HAMATIYE Mwenyekiti wa Chama Cha Mapinduzi (CCM), Rais Jakaya Kikwete, ameifumua na kuisuka upya Sekretarieti ya chama hicho, huku akimtupa nje Katibu Mkuu, Wilson Mukama.

Katika mabadiliko hayo, Rais Kikwete amemteua mwanasiasa mkongwe, Abdulrahman Kinana kuwa Katibu Mkuu mpya ambaye atakiongoza chama hicho kwa miaka mitano.

Kinana, ambaye katika uchaguzi mkuu wa mwaka 2010, alikuwa meneja kampeni wa Rais Kikwete, hivi karibuni alitangaza kuachana na siasa kwa kile alichodai amekitumikia chama hicho muda mrefu.

Kutokana na uteuzi huo, Rais Kikwete amemteua Mukama kuwa Mratibu wa Chuo cha Uongozi wa CCM pamoja na Vyama vya Ukombozi wa Bara la Afrika, kitakachojengwa katika eneo la Ihemi, mkoani Iringa.

Akitangaza uteuzi huo mjini Dodoma jana, Rais Kikwete alisema katika uteuzi huo ambao umeridhiwa na Halmashauri Kuu CCM (NEC), umekuwa na mafanikio kwa chama na Watanzania kwa ujumla.

Akiwataja walioteuliwa na kushika nafasi mpya, kuwa ni Vuai Ali Vuia, ambaye anaendelea na wadhifa wake wa Naibu Katibu Mkuu Zanzibar, huku Mwigulu Nchemba akiteuliwa kuwa Naibu Katibu Mkuu Bara.

Nchemba, amechukua nafasi ambayo ilikuwa ikishikiliwa na John Chiligati, ambaye ametupwa, wakati Mbunge wa Uzini, Dk. Mohamed Seif Khatibu, ameteuliwa kuwa Katibu wa Halmashauri Kuu, Oganizesheni akichukua nafasi ya Asha Abdallah Juma.

Katika uteuzi huo, Rais amemteua Zakhia Meghji kuwa Katibu wa Halmshauri Kuu, Uchumi na Fedha.

Pia Rais amemteua aliyekuwa Naibu Katibu Mkuu wa Umoja wa Mataifa (UN), Dk. Asha-rose Migiro, kuchukua nafasi ya Katibu wa Halmashauri Kuu, Siasa na Uhusiano wa Kimataifa, nafasi ambayo awali ilikuwa inaongozwa na Naibu wa Waziri wa Sayansi, Mawasiliano na Teknolojia, January Makamba, huku Nape Nnauye akiendelea na nafasi yake Katibu wa Halmashauri Kuu, Itikadi na Uenezi.

“Kwa kweli kikao hiki cha kwanza cha NEC, kimekuwa na mafanikio makubwa sana… kubwa hatua ya kukubalika kwa mapendekezo yangu mbele ya mkutano huu.

“Tumeunda Sekreterieti sasa, lakini suala la Kamati Kuu nimeiomba NEC kwanza iniachie, kuna wajumbe wengi wapya ambapo kama nitaiunda ninaweza kurudisha sura zile zile za wajumbe waliozoeleka.

“Lengo la kufanya hivi ni kuwafahamu, kwani kuna wajumbe wapya ili nao waweze kupata nafasi hii ambayo ni muhimu ndani ya chama chetu,” alisema Kikwete.

URAIS 2015: WANAWAKE KUVURUGA MAMBO CCM

MIGIRO, TIBAIJUKA, NAGU WATAJWA

Dr. Asha-Rose Migiro

HARAKATI za urais ndani ya Chama Cha Mapinduzi (CCM) zimeingia katika hatua mpya baada ya kuvuja kwa taarifa za kuwapo mkakati wa kuwapa nafasi wanasiasa wanawake na kuwatosa wanaume kwa kile kinachodaiwa kuvunja makundi yenye uhasama.

Habari za ndani ya makundi makuu ya wataka urais ndani ya CCM, zimethibitisha kuwapo taharuki kubwa miongoni mwao baada ya taarifa za wanawake kupewa nafasi kubwa kuzidi kushika kasi siku zinavyozidi kwenda.

Prof. Tibaijuka

”Kuna mpango wa kuwatosa wanaume kwa nia ya kuwapa fursa wanawake ndani ya CCM ili baadae atakayepatikana, akishinda akasaidie kulinda maslahi ya wale wasio na uadui wa kudumu, lakini wana maslahi ya kudumu (permanent interests)," alieleza mtoa habari wetu.

Habari zinaeleza kwamba, nguvu kubwa iliyotumika katika maeneo mbalimbali nchini katika chaguzi za ndani ya CCM ni moja ya mikakati ya maandalizi ya mpango huo wa kuwasimika wanawake.

Dr. Mary Nagu

Wataka urais wanaolengwa kuzimwa ni pamoja na Waziri Mkuu aliyejiuzulu kwa kashfa, Edward Lowassa, Waziri Mkuu mstaafu, Frederick Sumaye na Waziri wa Mambo ya Nje na Ushirikiano wa Kimataifa, Bernard Membe.

Wanawake wanaotajwa kufanikisha mpango huu ni Dk. Mary Nagu, Prof. Anna Tibaijuka na Dk. Asha Migiro ambao wote watasukumwa na makundi yenye fedha nyingi ili angalao wawili kati yao waingie hatua ya mwisho.

”Ambao wanatajwa kutaka kuingizwa hatua za mwisho ni Migiro na Tibaijuka ili wapate nafasi ya kupigiwa kura na wajumbe wa mkutano mkuu wa CCM ambao kwa kiasi kikubwa wameandaliwa kwenye chaguzi za CCM zinazoendelea kwa mikakati maalum na kwa nguvu kubwa ya fedha,” kilisema chanzo chetu.

Uchaguzi unaoendelea ndani ya CCM kwenye nafasi mbalimbali, una umuhimu wa peke yake mwaka huu kutokana na ukweli kwamba ndio uchaguzi wa mwisho ambao utaonesha sura halisi ya kuwapata wagombea wa nafasi za udiwani, ubunge na urais kwa tiketi ya CCM mwaka 2015.

Tayari makundi yameshajipanga kwa kuanza kufitiniana, kuwekeana mizengwe na mengi yanayofanana na hayo ili mradi tu watu wao wapite kwenye chaguzi hizi za ndani ya chama ili iwe rahisi kupata mtu wa kulinda maslahi yao au kujihakikishia ulaji pindi mtu wao atakapopita.

JK AINGIA WOGA

AMTUMIA MWANDOSYA KUJISAFISHA

Rais Kikwete

HATUA ya Rais Jakaya Kikwete kueleza mshangao wake kuhusu vitendo vya rushwa kupenya katika chaguzi zinazohusisha wanawake ndani ya Chama Cha Mapinduzi (CCM) imepokewa kwa hisia tofauti na makada wa chama hicho na wadadisi wa masuala ya siasa. 

Kikubwa kinachoonekana kuwashtua wafuatiliaji wa siasa ndani ya CCM ni hatua ya Rais Kikwete kutoa kauli ya mshangao pasipo kuonekana akichukua hatua zozote za kukabiliana na vitendo vya rushwa ambavyo yeye mwenyewe anakiri kwamba vinahatarisha uhai wa chama hicho.

Mmoja wa makada wa muda mrefu serikalini na ofisa wa juu mstaafu wa moja ya taasisi nyeti za dola, amelieleza kwamba, kauli ya Kikwete imeonyesha namna kiongozi huyo anavyojitanabahisha kwa namna tofauti na ilivyopata kufanywa na watangulizi wake watatu.

Ofisa huyo ambaye kama walivyo wengine wanne waliozungumza na waandishi wa gazeti hili kwa masharti ya kutotajwa kwa majina yao, alisema Rais Kikwete ambaye ndiye mwenyekiti wa taifa wa CCM alipaswa kutoa kauli ya kukemea, karipio na yenye mamlaka dhidi ya wagombea wanaotoa rushwa katika chaguzi zinazoendelea ndani ya chama hicho.

Kwa mujibu wa ofisa mwingine mstaafu, kitendo cha rais kutoa kauli zinazobadilika badilika kuhusu rushwa huku akiwa na mamlaka ya kuwachukulia hatua watuhumiwa wa vitendo hivyo hususan ndani ya serikali na katika vikao vya chama anavyoviongoza, ni dalili za woga wa kuchukua maamuzi sahihi.

“Rais wangu ni mtu wa kushangaza na mwoga. Amepata kusema anawafahamu wala rushwa kwa majina. Ni huyu huyu aliyewahi kutamka kuwa siku za wala rushwa zinahesabiwa na leo anasema eti anashangaa kusikia hata wanawake wanajihusisha na rushwa katika uchaguzi,” alisema kada mwingine mwandamizi ndani ya CCM.

RUSHWA ITAITUMBUKIZA CCM KWENYE SHIMO-JK

Rais  Jakaya Kikwete ameonya kwamba vitendo vya rushwa vinavyojitokeza katika chaguzi za ndani ya Chama Cha Mapinduzi (CCM) visipodhibitiwa  vitakitumbukiza chama hicho kwenye shimo.

Rais Kikwete alitoa angalizo hilo ikiwa ni siku moja tu, baada ya Mkutano Mkuu wa Umoja wa Wanawake wa CCM (UWT)  kumchagua Sophia Simba kuwa Mwenyekiti wake katika uchaguzi unaodaiwa kugubikwa na rushwa, vijembe na tambo.

Kikwete, amesema suala la kuuza na kununua kura lisiposhughulikiwa litakitumbukiza chama kwenye shimo. Kikwete aliyasema hayo juzi usiku alipokuwa akifunga Mkutano Mkuu Maalum wa uchaguzi wa UWT uliofanyika katika ukumbi wa Mwalimu Nyerere uliopo Chuo cha Mipango mjini hapa.

Rais Kikwete alisema kuwa wakati huu kuna mambo mengi ambayo baadhi yake yanasikitisha na kwamba hata kuyasema yanatia aibu.

“Kuna mambo mengi, mengine yanasikitisha hata kuyasema ni aibu, na wakati wote naendelea kukumbusha. Ndugu zangu haya tukiendelea nayo sura tunayoijenga kwa wananchi ya chama chetu… tunaona sisi tunapata, lakini athari yake kwa wananchi na ndani ya chama ni mbaya sana, tena sana, sina namna ya kutafuta maneno mazuri ya kulieleza hilo ya kununua na kuuza kura ,” alisema Rais Kikwete ambaye alionyesha kukerwa sana na jambo hilo na kuongeza:

“Nimeyasema haya ni lazima tufike mahali tutambue kuwa haya si mazuri na yanapohusisha mpaka wanawake, maana zamani nilidhani haya mambo ni ya wanaume tu, lakini sasa hadi wanawake ndio tena tumekwisha. Tunakoelekea sio kuzuri sana na kama hatutafanya jitihada ya makusudi kubadiliks, tupo hapa mtakuja kunieleza jinsi mtakavyoelekea kwenye shimo.”